သူတီထွင်တဲ့ ပင်ယင်းစနစ်ကို တရုတ်အစိုးရတင်မက၊ စင်္ကာပူ၊ ထိုင်ဝမ်နဲ့ မလေးရှားတို့မှာပါ တရားဝင် အသိအမှတ်ပြုထားပြီး၊ တရုတ် စကားနဲ့ အသံထွက် နားလည်လိုသူများအတွက် အများကြီး အားကိုးအားထား ဖြစ်စေသည်။ ပင်ယင်းစနစ်ကြောင့် ကွန်ဖျူးရှပ် အင်စတီကျူ့များ တကမ္ဘာလုံးတွင် မှိုလိုပေါက်လာပြီး၊ တရုတ်ဘာသာစကား လေ့လာသူ များပြားလာခဲ့သည်။
မစ္စတာကျောက် က ဗြိတိသျှ စွမ်စုံကျမ်း Encyclopedia Britannica ကို တရုတ်ဘာသာစကားဖြင့် ဦးဆောင် ဘာသာပြန်သူ ဖြစ်သလို၊ တရုတ်စွယ်စုံကျမ်း ပြုစုရေးအဖွဲ့ ခေါင်းဆောင်လည်း ဖြစ်သည်။ တရုတ်နှင့် အင်္ဂလိပ်လို စာအုပ် ၄၀ ကျော်လည်း ရေးသားထားသူ ဖြစ်သည်။
တရုတ်ခေါင်းဆောင်တွေက မစ္စတာကျောက် ကို လူငယ်တွေ စံထားထိုက်တဲ့ပုဂ္ဂိုလ်လို့ ပြောဆိုပေမဲ့၊ တရားဝင် ချီးမြှောက်မှု မလုပ်။ အခမ်းအနားတွေမဖိတ်။ အဓိကအကြောင်းက မစ္စတာကျောက်က တစ်ပါတီစနစ်ကို မထောက်ခံခြင်းကြောင့် ဖြစ်သည်။
၂၀၀၉ ခုနှစ်မှာ တရုတ်အစိုးရက စွယ်စုံကျမ်း ပြုစုရေးအဖွဲ့မှ ပညာရှင် ၅၀၀ ကျော်ကို အခမ်းအနားလုပ်ပေးခဲ့ပေမဲ့၊ သူ့ကို မဖိတ်။ သူ့မိတ်ဆွေတွေရဲ့ ပြောပြချက်ကတော့ ကွန်မြူနစ်ပါတီ ၀ါဒဖြန့်ချီရေးမှူး Li Changchun က မစ္စတာကျောက်ကို လက်ဆွဲ မနှုတ်ဆက်ချင်သောကြောင့်ဟု ဆိုသည်။ မစ္စတာကျောက်က ပါတီက လူတွေကို သိပ်ဂရုမစိုက်သလို၊ ပါတီကလည်း သူ့ကို ခြိမ်းခြောက်မှုတော့ မလုပ်။
မစ္စတာကျောက်က “ဒီမိုကရေစီဆိုတာ ခေတ်သစ်လူ့အဖွဲ့အစည်းအတွက် သဘာဝပုံစံတစ်ခုပဲ” လို့ ကြေငြာထားသည်။ ဒီမိုကရေစီဟာ တရုတ် နှင့် မသင့်တော်ပါဘူးဆိုတဲ့ ပြောဆိုမှုတွေကို အပြတ်ငြင်းပယ်သည်။ “ဖွံ့ဖြိုးမှုအဆင့် နိမ့်နိမ့် မြင့်မြင့် ကိစ္စမရှိဘူး၊ ဒီမိုကရေစီ ရှိကိုရှိရမယ်” ဟု ပြောဆိုသည်။
မစ္စတာကျောက် ကို ၁၉၀၆ ခုနှစ် ဇန်န၀ါရီ ၁၃ ရက် တရုတ်နောက်ဆုံး မင်းဆက်ခေတ်မှာ မွေးဖွားခဲ့သည်။ ချမ်းသာတဲ့ မိသားစုရဲ့ သမီးတဦးကို လက်ထပ်ပြီး ဘဏ်လုပ်ငန်း လုပ်ခဲ့သည်။ ၁၉၃၇ ခုနှစ် ဂျပန် ကျူးကျော်ပြီး ချုံကင်းမြို့ကို ဗုံးကျဲချိန်မှာ တောကို သူ့မိသားစု ပြောင်းခဲ့ပြီး ငါးနှစ်အရွယ် သမီးကြီး သေဆုံးခဲ့သည်။ ကွန်မြူနစ်ပါတီကို ဘယ်တော့မှ မ၀င်တဲ့အတွက် အသက် အန္တရာယ် ရှိခဲ့ပြီး၊ ပါတီခေါင်းဆောင်ပိုင်းမှ ချူအင်လိုင်းနဲ့ ရင်းနှီးမှုကြောင့် အသက် ချမ်းသာရာ ရခဲ့သည်။
ရှန်ဟိုင်း တက္ကသိုလ်မှာ ဘောဂဗေဒဆရာ လုပ်ရင်း၊ ဘာသာဗေဒကို သင်ယူခဲ့သည်။ ၁၉၄၆ မှာ သူ့မိသားစုနဲ့အတူ နယူးယော့ခ်ကို ပြောင်းခဲ့ပြီး ဘဏ်လုပ်ငန်းကြောင့် ချမ်းသာခဲ့သည်။ သိပ္ပံပညာရှင် အိုင်စတိုင်းနှင့်လည်း ရင်းနှီးခဲ့သည်။
၁၉၅၅ ခုနှစ်မှာ ၀န်ကြီးချုပ်ဖြစ်လာတဲ့ ချုအင်လိုင်းက သူ့ကို ပေကျင်းပြန်ခေါ်ပြီး၊ တရုတ်အမျိုးသားဘာသာစကားကို နိုင်ငံတကာ အသံထွက် သင်္ကေတသစ်နဲ့ တီထွင်ဖို့ သူကို အတင်းတာဝန်ပေးခဲ့သည်။ နောက်နှစ်မှာ ဥက္ကဌမော်ရဲ့ လက်ျာ ဆန့်ကျင့်ရေးလှုပ်ရှားမှု ပေါ်ထွက်လာပြီး၊ အနောက်တိုင်းပြန် ပညာတတ်များကို ပစ်မှတ်ထား တိုက်ခိုက်လာခဲ့သည်။ မစ္စတာကျောက် ရဲ့ ကျောင်းသားတစ်ယေက်နဲ့ အရင်းနှီးဆုံး မိတ်ဆွေ စီးပွားရေးပညာရှင်တစ်ဦး သတ်သေသွားသည်။
၁၉၆၆ ခုနှစ် ယဉ်ကျေးမှုတော်လှန်ရေးကာလမှာ နှစ်နှစ်လောက် တောထဲမှာ အလုပ်ကြမ်းလုပ်ဖို့ အပို့ခံရသည်။ ဒါပေမဲ့ သူနဲ့ သူ့တပည့်တွေ အမြဲအဆက်အသွယ်လုပ်ပြီး၊ တရုတ်စကားကို လာတင်အက္ခရာနဲ့ အသံထွက်စနစ်သစ်ထွင်ဖို့ သဲသဲမဲမဲ ကြိုးစားခဲ့သည်။
တရုတ် အရုပ်စာလုံးတွေဟာ ရာစုနှစ်များစွာ တည်ရှိခဲ့တာမှန်ပေမဲ့၊ အခု ပင်ယင်း စနစ်ကသာ ပိုမို အသုံးဝင်လာမယ်ဟု သူက ပြောသည်။ ယခု တရုတ်စကားဖြင့် ဖုန်းမက်ဆေ့ခ်ျပို့မှု၊ အီးမေးလ် ရေးသားမှုနဲ့ ဘလော့ဂ် ရေးသားမှုများတွင် ပင်ယင်းစနစ် အခြေခံ အသုံးပြုမှု များပြားလာတာကို သူကိုယ်တိုင် မြင်နေရသည်။
အသက် ၁၀၆ နှစ်ပြည့် အင်တာဗျူးတွင် မစ္စတာကျောက်က မော်စီတုံးနဲ့ ပတ်သက်ပြီး၊ “ကောင်းရာကောင်းကျိုး ဘာတစ်ခုမှ မလုပ်ခဲ့ဘူး” အပြတ်ပြောသည်။ ၁၉၈၉ တီယန်မင်အရေးအခင်းနဲ့ ပတ်သက်ပြီးလည်း “တရားမျှတစွာ ဖော်ထုတ် အရေးယူမှု မကြာခင် တစ်နေ့မှာ ဖြစ်လာလိမ့်မယ်” ဟု ပြောသည်။ တရုတ်အစိုးရကတော့ သူ့ ပြောဆိုမှုတွေအပေါ် အသက် ၁၀၆ နှစ် အဖိုးအိုဖြစ်လို့ လွှတ်ထားဟန် ရှိသည်။
မစ္စတာကျောက် က ၂၀၁၀ ခုနှစ်ထုတ် သူ့အက်ဆေး စာအုပ်မှာ “တီထွင်ဆန်းသစ်မှုတွေဆိုတာ လှပတဲ့ ပန်းပွင့်တွေလိုပဲ၊ လွတ်လပ်တဲ့ မြေကြီးပေါ်မှာသာ ရှင်သန်ကြီးထွားလာနိုင်တာ။ တီထွင်ဆန်းသစ်မှုတွေဆိုတာ အစိုးရ အမိန့်အောက်ကနေ ဘယ်လိုမှ ထွက်လာစရာ အကြောင်းမရှိဘူး” ဟု ရေးထားသည်။
မူရင်း : Maukkha.org
No comments:
Post a Comment